Fredi Beleri sfidon dënimin në Gjykatën e Lartë: Pretendon padrejtësi dhe sulmon gjyqtaren e çështjes

Eurodeputeti i Demokracisë së Re, Fredi Beleri, i cili u dënua me 16 muaj burg në Shqipëri për blerje votash, ka paraqitur prova të reja në Gjykatën e Lartë, duke kërkuar rishikimin e vendimit që, sipas tij, është i paligjshëm dhe i ndikuar politikisht.

Në një deklaratë publike, Beleri tha se ka dorëzuar dokumente kyçe që sfidojnë legjitimitetin e procesit gjyqësor ndaj tij. “Në një përpjekje për të korrigjuar padrejtësinë që pësova, i burgosur për 16 muaj dhe i privuar nga detyra e kryetarit të bashkisë së Himarës, paraqita prova të rëndësishme në Gjykatën e Lartë,” deklaroi ai.

Eurodeputeti grek, i cili u zgjodh në Parlamentin Evropian ndërsa ishte ende në burg, akuzoi gjyqtaren që e dënoi, Irena Gjoka, për paragjykim dhe konflikt interesi. Ai pretendon se Gjoka është vetë një person i dënuar në Greqi për falsifikim, gjë që, sipas tij, e bën të papërshtatshme për të ushtruar funksione gjyqësore në Shqipëri. “Kjo shpjegon urrejtjen që ajo ushqen ndaj pakicës greke dhe përfaqësuesve të saj të zgjedhur,” shtoi Beleri.

Ai e quajti të paligjshme jo vetëm dënimin, por edhe të gjithë procesin, duke e cilësuar si një akt të motivuar politikisht dhe me prova të fabrikuara. Beleri përmendi gjithashtu se prokurorja e çështjes së tij ndodhet aktualisht në paraburgim për “ndikim të paligjshëm” në çështje të tjera.

“Unë u arrestova nga një prokuror që sot është nën hetim dhe u dënova nga një gjyqtare e dënuar më parë, që nuk duhej të ishte fare në sistemin e drejtësisë. Kjo nuk është drejtësi,” theksoi ai.

Në përfundim të deklaratës së tij, Beleri bëri thirrje për drejtësi të vërtetë dhe veprim në përputhje me ligjin. “Sot, bazuar në ligj, i kërkova Gjykatës së Lartë të Shqipërisë të rishikojë vendimet që kanë të bëjnë me mua. Shpresoj që drejtësia shqiptare do të ngrihet në lartësinë e situatës. Edhe tani, edhe më vonë. Drita duhet ta mposhtë errësirën,” përfundoi ai.